山窮水盡疑無路

1.OTOTOT：又係一年一度的OT月，星期六都要返工。但今年咁o岩有同事走，公司出少o左書，咁我當然會少o左o野做，所以今年O得唔勁，唔駛拎o野返屋企做，6月頭2個星期六都唔駛返住，本來預定返的星期六，又有一日因為打風而無返到。不過好彩最後都順利完成晒我要做o既o野，今年7‧1唔駛o係屋企都要做公司o野。

2.戒口：識我o既人都知我體弱多病，三五七日就病一轉，之前o係屋企附近睇中醫，但都無乜進展，就去好多人話好的中醫試o下。有無成效暫時未知，但佢要我戒口戒得好清，一切麵、蛋、奶、酸、辣、黃豆類、牛、羊、魚以外o既海鮮全部唔食得，仲要連蕃茄、薯仔、茄子呢d大路蔬果都唔食得，出街食飯真係好頭痕。咁戒口法，即係等於要戒埋我心愛o既甜品同零食，我又唔多鍾意食飯同魚，真係無啖好食咁。

但係，開始o左之後又覺得ok o咼，真係無我想像中咁難咁痛苦，而家食lunch好快揀好，因為無乜o野好揀嘛，haha~~仲有額外bonus，就係瘦o左3,4磅，相信我繼續落去的話，好快回復結婚時勁fit的身型，哈哈！

同埋我發現，原來戒口要出街食飯，西式o野真係唔o岩食，反而中式都有好多選擇，各位約我食飯唔該中式o丫！

3.咳緊：諗住去游水做o下運動，點知我呢個潺仔強又凍親，搞到而家咳啦。中醫見我咳，又比一張水蛇春咁長o既戒口紙比我，本來仲食得的蔬菜好多都唔食得，而家食得o既蔬菜只有菜心、豆角、節瓜，再搭瘦肉、魚同飯，齋到呢~~

4.上網買衫：同事好介紹，比o左個好網我，搞到我買完又買，卡數張單都未寄o黎又再上去買買買！而且買o既數量一次比一次多…

5.旅行心癮又起：見有豬流感保險，又心思思想去玩。不過check過價，暑假真係太唔抵去，可能都係要等8月尾9月過o左旺季先算。

1.睇o左幾套戲：（特別場）未來戰士2009、天使與魔鬼、(睇過又睇、明珠台重播的)達文西密碼
2.剪o左髮：又變返好短，好似3個月前去海南島時個頭。
3.終於做好一份freelance：最大型o個份，搞o左個幾2個月，終於搞掂晒。唔該晒尼爾姐姐幫忙~~（不過6月又進入漫畫節地獄MODE，我無幾多日風流快活）
4.跟郭喜利飯聚：近呢一兩年郭小姐返得o黎好密，好似幾個月又見一次，不過每次都傾得好開心。
5.暫時打消旅行o既念頭：我認，我杞人憂天，我細膽，我無用，但我呢d渣人真係怕o左豬流感。就算唔係自己有事，搭飛機時前後3行有人發燒（發燒o乍o咼，唔一定有事o架）你都有排煩。
6.立体ピクロス：終於爆o左機，而家無game玩。

睇完「達文西密碼」已經十二點幾，沖完涼拿拿林上床訓覺，正當本人開始曚曚曨曨就快恰著之際，竟然被人用腳指抓了幾下，即刻醒晒。

又被人整醒，都唔知已經幾多次。雖然好嬲，但當事人又訓到死豬咁，鬧都無意思，而且呢d時候鬧，被鬧的人被鬧完又唔記得，鬧人的扯晒火更加訓唔倒。算，訓覺，訓醒先鬧。

然後時間一分一秒咁過，呢個一心諗住算o既人仲係未訓著，睇住天色開始變白。

呢個時候，唔知係好彩定唔好彩，有人起身「晨」尿，訓唔著o既人積o左一晚比人嘈醒之後訓唔著o既怨氣，開始機關槍式發炮，尿尿o既人被人鬧住尿鬧住訓，鬧人o既人又竟然鬧住訓返著，恰返半粒鐘先返工。

夜半的「出來事」一則，報導完畢。

想貼好耐，耐到人o地都唱o左個show我都未貼。

個題真係好正~~

能夠有了解自己、講咩都唔怕對方會嬲、可以讓我暢所欲言o既朋友，實在太好啦！
好開心可以咁盡情咁傾偈，講足5個鐘！
除o左中學時講電話，我好似好耐無試過咁樣不停講o野法啦。
希望到o左我o地七老八十，變o左阿婆依然咁多偈好傾，呵呵呵~~

I love you all！
（講呢句唔知有人會呷醋呢？）

講美食之前，先要介紹o下今次的團長。

團長係我隔離位的為食精兼台灣迷同事，熟台灣多過旺角，聞說她瘋狂時不足兩個月就飛一轉台灣。

成團的原因，係某日貪靚同事講開不如組個美食團，加上有舊同事在台灣租屋，大家都有免費住宿，又有台灣迷擔任團長，結果自然一呼百應。

不過，同事始終係同事，唔係個個o岩傾o岩玩，睇o下人腳o既配搭，就知有幾九唔搭八：
團長：為食乾物女
副團長：即係住o係台灣o既舊同事，重度BL腐女。
團友J：超靜，同佢識o左十年o既同事都話佢無o野講。
團友S：團友J的家姐。
團友L：貪靚港女，鍾意嘆，唔行得唔拎得。
團友Y：溫室宅女。

加埋本人，一共七人在台灣共度了三天時光。結果？

就係對D同事加深o左了解囉，無鬧交、無出意外，個個順利返o黎（其實正、副團長仲o係台灣玩緊），可喜可賀！

其實相中隱藏了幾位團友，係邊個就自己估啦~~

 

因為臨時想打網球，今日book聽日打，都估到唔會有好時間，結果一係好夜，一係中午1:00至2:00，一係一早8:00至9:00。
因為唔想曬，又怕太夜打第二日返工好攰，所以選擇o左一早去打。

結果我o地成7:45先起倒身，如果唔係比o左錢應該會選擇放棄…

打完波沖完涼，10點半整好早餐坐底慢慢嘆，之後再睇o下雜誌玩o下game，好似hea o左好耐咁，但原來先至係12點。小睡片刻再起身睇午間新聞，之後做翻譯到三點幾同康媽落樓飲茶。

搞完一大輪都未做晚間新聞，原來早起d時間真係好好駛（其實平時放假我o地都唔晏起的，最多10點，因為要趕11點前去早餐；不過咁早真係好少有）。

以為咁早起身打波會好攰好眼訓，原來又唔係o咼，一沖完涼之後個人好精神好舒服，加上今日天氣清爽，唔凍又唔熱，令人整日都心情大好。

為健康著想，加上早起d時間好好用，我以後放假都要盡量早起做運動，當然加埋早睡會更理想啦！